Երեւան: Մեդիամաքս: Եվրոպական միությունն այսօր զեկույց է հրապարակել Հայաստանում տեղի ունեցող զարգացումների եւ 2018թ. հունիսից 2019թ. մայիսն ընկած ժամանակահատվածում ԵՄ-ՀՀ հարաբերությունների մասին:

Մեդիամաքսը հատվածներ է առանձնացրել զեկույցից։

ԵՄ կարեւոր դերը հայաստանյան բարեփոխումներում

Հայաստանն ավելացրել է ԵՄ-Հայաստան գործընկերության ամրապնդմանն ու ընդլայնմանն ուղղված ջանքերը եւ հետեւողականորեն ճանաչել է, որ Եվրամիությունը կարեւոր դեր կարող է կատարել երկրի բարեփոխման օրակարգի սահուն իրականացման գործում:

Այդուհանդերձ, բարեփոխումների գործընթացն իր վաղ փուլում է մնում: ՀՀ կառավարության կողմից ներկայացված՝ ԵՄ-ՀՀ համապարփակ եւ ընդլայնված գործընկերության համաձայնագրի իրականացման ճանապարհային քարտեզը կարեւոր գործիք է բարեփոխման ծրագրերի առաջխաղացման համար:

Մոգերինի. Հայաստանը կարեւոր գործընկեր է

«Եվրոպական միությունը եղել է եւ կշարունակի մնալ ՀՀ կառավարության ստանձնած՝ ժողովրդավարության եւ օրենքի գերակայության ամրապնդմանն ու երկրում մարդու իրավունքների խթանմանը միտված հավակնոտ բարեփոխումների ծրագրի ամենամեծ աջակիցը:

Հայաստանը կարեւոր գործընկեր է Եվրամիության համար եւ մենք կենտրոնացած ենք մեր լայնածածկույթ երկկողմ համաձայնագրի իրականացման, ինչպես նաեւ Արեւելյան գործընկերության շրջանակում կոնկրետ արդյունքների ապահովման  վրա:

Մշտապես կայուն համոզմունք ունենք, որ մեր նպատակները շոշափելի օգուտներ են բերում մեր քաղաքացիներին»,- նշել է Եվրամիության արտաքին քաղաքականության եւ անվտանգության քաղաքականության բարձր ներկայացուցիչ, Եվրոպական հանձնաժողովի փոխնախագահ Ֆեդերիկա Մոգերինին:

ՀՀ-ԵՄ առեւտրի ծավալն ավելացել է

Նախորդ տարվա ընթացքում Եվրամիության եւ Հայաստանի միջեւ առեւտրի ընդհանուր ծավալն ավելացել է 15 տոկոսով՝ հասնելով ընդհանուր 1,1 մլրդ եվրոյի:

Հայաստանն օգտվում է Եվրամիության Արտոնությունների ընդհանրացված համակարգ պլյուսի հնարավորություններից, որը կայուն զարգացման եւ լավ կառավարման ապահովման համար նախատեսված հատուկ նախաձեռնություն է:

Կրթության ոլորտում երկխոսություն

Կրթության ոլորտի բարեփոխումների աջակցության նպատակով 2019 թվականի մարտին մեկնարկ է տրվել կրթության ոլորտում ՀՀ-ԵՄ քաղաքական երկխոսությանը: Էրասմուս+ կարողությունների զարգացման ծրագրերի շնորհիվ հայկական բուհերը կարողացել են բարելավել իրենց վարչական եւ կազմակերպչական կառուցվածքը եւ արդիականացնել ուսումնական ծրագրերը:

EU4Innovation ծրագիրը

2018 թվականին մեկնարկել է 23 մլն եվրո արժողությամբ նոր EU4Innovation ծրագիրը՝ միտված համալսարանների շրջանավարտների հմտությունների  համապատասխանեցմանն աշխատաշուկայի պահանջներին: Ծրագրի միջոցով կստեղծվի EU4Innovation համալիր համալսարանների համար եւ ԵՄ կոնվերգենցիայի կենտրոն, որը կմիավորի համալսարաններն ու մասնավոր հատվածը եւ կհամալրի ինկուբատոր փոքր տեխնոլոգիական ստարտափների համար:

ԵՄ-ն կշարունակի աջակցել ՀՀ-ին

Եվրոպական միությունը Հայաստանի ֆինանսական օժանդակության խոշորագույն մատակարարն ու բարեփոխման առանցքային գործընկերն է: ԵՄ-ն պատրաստ է շարունակել ներգրավվածությունը Հայաստանում եւ ցուցաբերել աջակցություն քաղաքական երկխոսության, ֆինանսական եւ տեխնիկական օժանդակության միջոցով եւ աջակցել ՀՀ կառավարության հավակնոտ բարեփոխումներին՝ ի բարօրություն ՀՀ  քաղաքացիների եւ ի նպաստ ԵՄ-Հայաստան համագործակցությանը: