Երեւան, Մեդիամաքս: Հայաստանում ԱՄՆ դեսպան Մարի Յովանովիչը այսօր «բացարձակ անընդունելի» է անվանել Բաքվի հայտարարությունները դեպի Ստեփանակերտի ուղեւորվող քաղաքացիական ինքնաթիռները գնդակոծելու մտադրության մասին:
Ինչպես հաղորդում է Մեդիամաքսը, այսօր Հայաստանում ՆԱՏՕ-ի Տեղեկատվական կենտրոնում կայացած մամուլի ասուլիսում Մարի Յովանովիչը հիշեցրել է, որ Ադրբեջանում ԱՄՆ դեսպան Մեթյու Բրայզան արդեն արձագանքել է այդ «շատ լուրջ հարցին»:
Ամերիկացի դիվանագետը Ադրբեջանին կոչ է արել հարգել հակամարտության խաղաղ կարգավորման մասին ստանձնած իր պարտավորությունները:
Մարի Յովանովիչը հայտարարել է, որ Վաշինգտոնը շատ լուրջ է վերաբերում ղարաբաղյան կարգավորման բոլոր սկզբունքներին, սակայն կարծում է, որ «ուժի չկիրառման սկզբունքը առավել քան կարեւոր է, քանի որ այս հակամարտությունը ռազմական լուծում չունի»: