Երեւան: Մեդիամաքս: Գերմանիայի կանցլեր Անգելա Մերկելն այսօր Երեւանում ասել է, որ Գերմանիան ցանկանում է Հայաստանի հետ ավելի ակտիվ համագործակցություն ծավալել:
«Մեր հարաբերությունները շատ լավն են, բայց կարող են ավելի ընդլայնվել: Ինձ ուղեկցում է տնտեսական պատվիրակություն: Կցանկանանք համագործակցել թվայնացման, գիտության եւ կրթության ոլորտներում: Մեր երկու երկրների գիտական հաստատությունների համագործակցությունը կարելի է ավելի խորացնել»,- ասել է Անգելա Մերկելը՝ ՀՀ վարչապետ Նիկոլ Փաշինյանի հետ համատեղ ասուլիսի ժամանակ։
Խոսելով Հայաստան-ԵՄ նոր համաձայնագրի մասին՝ կանցլերը նշել է, որ Գերմանիան կանի հնարավորը՝ աջակցելու դրա կիրարկման գործընթացին։
«Ուրախ ենք, որ Հայաստանին հաջողվել է կնքել Համապարփակ եւ ընդլայնված գործընկերության համաձայնագիր Եվրոպական միության հետ: Գերմանիան իր ներդրումը կունենա համաձայնագրի իրագործման մեջ»,- ասել է նա:
Ինչ վերաբերում է Հայաստանի եւ Եվրամիության միջեւ վիզաների ազատականացման հարցին, կանցլերն ասել է.
«Վրաստանի եւ Ուկրաինայի հետ վիզաներն ազատականացվել են: Մենք մեր կողմից անելու ենք հնարավոր ամեն ինչ՝ Հայաստանի հետ եւս վիզաների ազատականացմանը հասնելու համար»:
Անդրադառնալով ԼՂ հակամարտության կարգավորման թեմային՝ Գերմանիայի կանցլերը նշել է, որ կոնֆլիկտները հնարավոր է լուծել միայն բանակցությունների միջոցով։
«Մենք պետք է ջանք ներդնենք, որ այդ համակարտությունը հնարավորինս արագ լուծենք»,- ասել է Անգելա Մերկելը։
Նիկոլ Փաշինյանն էլ հայտնել է, որ կանցլերի այցի արդյունքներով երկկողմ համագործակցության տարբեր ոլորտներին առնչվող կոնկրետ գործողությունների օրակարգ է ձեւավորվելու։
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: