Երեւան: Մեդիամաքս: ՀՀ կառավարությունն այսօրվա արտահերթ նիստում հավանություն է տվել Ընտրական օրենսգրքում փոփոխություններ եւ լրացումներ կատարելու մասին օրենսդրական նախաձեռնությանը:

ՀՀ արդարադատության նախարար Արտակ Զեյնալյանը ներկայացրել է նոր նախագծով առաջարկվող հիմնական փոփոխությունները.

- Ազգային ժողով մուտք գործող կուսակցությունների կամ կուսակցությունների դաշինքը կավելանա՝ 3-ից դառնալով 4։

- Անցողիկ շեմը կնվազի՝ կուսակցությունների համար նախկին 5%-ի փոխարեն՝ 4%, իսկ կուսակցությունների դաշինքների պարագայում՝ 7%-ի փոխարեն 6%:

- Կվերանան թեկնածուների տարածքային ցուցակները, կընդունվի պարզ համամասնական ընտրակարգ:

Ընտրողների իրազեկվածության բարձրացումն ապահովելու նպատակով փաթեթը նախատեսում է.

- ամրագրել համապետական ընտրությունների ժամանակ Հանրային հեռուստատեսությամբ հեռուստաբանավեճերի կազմակերպումը, ապա դրանց անվճար վերահեռարձակումը այլ լրատվամիջոցներով;

- ապահովել ԶԼՄ-ներով ոչ միայն քարոզարշավի, այլեւ ընտրություններին մասնակցող թեկնածուների, կուսակցությունների ու դրանց ծրագրերի առավել հավասար լուսաբանման կարգավորումը,

- ավելացնել Հայաստանի Հանրային ռադիոյով եւ հեռուստատեսությամբ անվճար եթերաժամանակի քանակը:

Ընտրական գործընթացների նկատմամբ վերահսկողության հնարավորությունների բարձրացման նպատակով նախատեսվում է.

- կրճատել ՀԿ-ների հավատարմագրման վերջնաժամկետը;

- վերացնել դիտորդների եւ ԶԼՄ ներկայացուցիչների գումարային  թիվը տեղամասում սահմանափակելու հանձնաժողովի իրավունքը;

- սահմանել միջազգային եւ օտարերկրյա դիտորդական կազմակերպություններին հրավեր ուղարկելու ընթացակարգը։

Նախատեսվում է ՀՀ պաշտպանության նախարարության միջոցով ապահովվել զորամասերում քարոզչության հավասար պայմաններ՝ առանց անցագրային ու գաղտնիության ռեժիմի փոփոխման: Ինչպես նաեւ.

- սահմանվում են մեխանիզմներ զինծառայողներին նախընտրական քարոզչությանը հեռուստատեսությամբ հետեւելու համար;

- զինվորականների քվեարկության ընթացքում արգելվում է վերադաս սպայի գտնվելը քվեարկության սենյակում։