Երեւան: Մեդիամաքս: ՄԱԿ-ի հատուկ զեկուցող Կլեման Նյալեցոսի Վուլեն նոյեմբերի 7-16-ը Հայաստանում է՝ գնահատելու խաղաղ հավաքների եւ միություններ կազմելու իրավունքի իրականացումը:
«Հայաստանը խաղաղ ժողովրդավարական անցման ուղիով է ընթանում. այն հսկայական ներուժ է պարունակում մարդու իրավունքների, հատկապես խաղաղ հավաքների եւ միություններ կազմելու իրավունքի համապարփակ պաշտպանության եւ ամրապնդման ուղղությամբ , ինչպես նաեւ օրենքի գերակայության առումով՝ ժողովրդավարական ձեռքբերումներից եւ տնտեսական զարգացումից օգտվելու համար»,- ասել է ՄԱԿ-ի փորձագետը:
«Այս այցը հնարավորություն կընձեռի ինձ ուսումնասիրելու Հայաստանում խաղաղ հավաքների եւ միություններ կազմելու ազատությանն առնչվող խնդիրները՝ ներգրավված տարբեր դերակատարներից անմիջականորեն ստացված տեղեկատվության միջոցով»,- հավելել է Կլեման Նյալեցոսի Վուլեն:
10-օրյա առաքելության ընթացքում փորձագետը կայցելի Գյումրի, Վանաձոր, Վայք եւ Երեւան, կհանդիպի կառավարության աշխատակիցների, դատական համակարգի, օրենսդիր համակարգի ներկայացուցիչների, լրատվամիջոցների, քաղաքացիական հասարակության ներկայացուցիչների, ինչպես նաեւ ՀՀ մարդու իրավունքների պաշտպանի հետ: Նա կհանդիպի նաեւ դիվանագիտական կորպուսի, ՄԱԿ-ի համակարգի եւ այլ միջազգային կազմակերպությունների ներկայացուցիչների հետ:
Կլեման Նյալեցոսի Վուլեն իր այցի մասին համապարփակ զեկույց կներկայացնի 2019թ. հունիսին:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: