Երեւան: Մեդիամաքս: ՀՀ նոտարական պալատում այսօր ներկայացվել է Էլեկտրոնային նոտար համակարգը:
«Համակարգն արդյունավետ մտել է նոտարի գործողությունների իրականացման պրակտիկ դաշտ եւ 2014-ից ամբողջությամբ գործարկվում է ՀՀ ողջ տարածքում»,-ասել է ՀՀ նոտարական պալատի նախագահ Հասմիկ Հարությունյանը:
Էլեկտրոնային նոտար համակարգի համապատասխան ծրագիրը թույլ է տալիս նոտարին անձամբ եւ առցանց տարբերակով ստանալ նոտարական գործողության կատարմանն անհրաժեշտ փաստաթղթեր, ապահովում է առցանց ուղիղ կապ նոտարի եւ պետական այլ մարմինների միջեւ, ինչի շնորհիվ նոտարը կարողանում է գրասենյակից կատարել այլ գործառույթներ՝ կրճատելով հանրությանը մատուցվող ծառայությունների ժամկետը:
Համակարգի յուրաքանչյուր փաստաթուղթ համապատասխան թվերի միջոցով կոդավորված է, ինչը պետք է բացառի հնարավոր կեղծ փաստաթղթերի շրջանառությունը: Մեկ պատուհանի սկզբունքով աշխատանքը եւս հնարավորություն է տալիս կարճ ժամանակում ստուգել փաստաթղթերի օրինականությունը:
Պատասխանատուները նշում են, որ էլեկտրոնային կառավարումն արդյունավետ դաշտ է ստեղծել նաեւ ժառանգական գործերի համար: Ներկայում ՀՀ ամբողջ տարածքում ընթանում է 1940-ից սկսած բոլոր կտակների թվայնացումը:
«Համոզված ենք, որ նորագույն տեխնոլոգիաները կարեւոր տեղ են զբաղեցնում բիզնեսում եւ կառավարման համակարգում: ԵՄ-ն բազմիցս օգնել է Հայաստանին նմանատիպ նախագծերի ստեղծման եւ զարգացման հարցում, որոնց համար տարեկան 40-50 մլն եվրո է ներդրել»,- ասել է Հայաստանում Եվրոպական Միության պատվիրակության համագործակցության բաժնի ղեկավար Հոա-Բին Աջեմյանը:
Էլեկտրոնային նոտար համակարգի ներդրման ծրագիրը ֆինանսավորվել է Եվրոպական Միության, իրականացվել՝ Եվրոպայի խորհրդի կողմից:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: