Երեւան: Մեդիամաքս: Հայոց Ցեղասպանության 100-րդ տարելիցի առիթով ապրիլի 22-24-ին կայանալիք եկեղեցական արարողություններին կմասնակցեն 38 Եկեղեցիների, միջեկեղեցական եւ էկումենիկ կառույցների ու միջկրոնական կազմակերպությունների ներկայացուցիչներ:

Այդ մասին խոսվել է փետրվարի 24-ից 26-ը Մայր Աթոռ Սուրբ Էջմիածնում գումարված Գերագույն հոգեւոր խորհրդի ժողովում` ընդլայնված կազմով:

Հյուրերի թվում են դավանակից չորս Եկեղեցիների եւ երեք Ուղղափառ Եկեղեցիների պետեր, էկումենիկ կառույցների ութ նախագահներ եւ գլխավոր քարտուղարներ, Ուղղափառ, Կաթոլիկ, Անգլիկան եւ Բողոքական Եկեղեցիների պատվիրակություններ, եկեղեցականներ Ռուանդայից եւ Դարֆուրից:

Արարողություններին կմասնակցեն նաեւ ներկայացուցիչներ աշխարհասփյուռ բոլոր հայոց թեմերից:

Ժողովին Գերագույն հոգեւոր խորհրդի անդամներն անդրադարձան ապրիլի 22-24-ը Հայաստանում եւ Մայր Աթոռում կազմակերպվելիք Սրբադասման արարողությանը եւ ոգեկոչման միջոցառումներին: Քննարկվեցին ապրիլի 22-ի Հսկման արարողության, ապրիլի 23-ի Ս. Պատարագի եւ Սրբադասման արարողության հետ կապված կազմակերպչական հարցեր, տեղեկություններ փոխանցվեցին սրբապատկերի եւ մասնատուփի պատրաստման, շարականի կանոնի բազմաձայնման գործընթացի մասին, ինչպես նաեւ հիշատակի այլ արարողություններին Հայ Եկեղեցու մասնակցության վերաբերյալ: