Երեւան: Մեդիամաքս: Երեւանում այսօր կայացել է Պաոլո Կոսսիի, Ժան Ջիանի եւ Ժան Վարուժան Սիրափյանի հեղինակած՝ «Նեմեսիս գործողությունը. Սողոմոն Թեհլերյան» գրքի շնորհանդեսը:
Գիրքը պատկերապատումներով ներկայացնում է «Նեմեսիս» հատուկ գործողությունն ու Սողոմոն Թեհլերյանի կողմից Հայոց ցեղասպանության գլխավոր կազմակերպիչ Թալեաթ փաշայի գնդակահարության պատմությունը:
Գրքի համահեղինակ Ժան Վարուժան Սիրափյանն ասել է, որ նախագծի գաղափարը ծագել է 4-5 տարի առաջ, եւ միայն հիմա է հնարավորություն ընձեռվել այն կյանքի կոչելու:
«Սողոմոն Թեհլերյանի մասին բոլորը գիտեին, բայց «Նեմեսիս» գործողության պատմությունը քչերին է հայտնի: Կարեւոր փաստ է այն, որ այս գործողությամբ սպանվել են թուրքական դատարանի կողմից դատապարտված եւ փախուստի դիմած թուրքերը, ոչ մի անմեղ մարդ չի տուժել: Սա ոչ թե ահաբեկչական, այլ վրիժառության գործողություն էր»,- ասել է գրքի համահեղինակը:
Նա նշել է, որ Հայաստանում հրատարակվել են գրքի հայերեն եւ ռուսերեն տարբերակները՝ 400-ական օրինակով: Ավելի վաղ լույս են տեսել ֆրանսերեն, անգլերեն, հունարեն օրինակները: Ֆրանսիայում արդեն 2000 օրինակ է սպառվել: Նախատեսվում է գիրքը հրատարակել նաեւ թուրքերեն եւ գերմաներեն լեզուներով:
ՀՀ մշակույթի փոխնախարար Ներսես Տեր-Վարդանյանը, խոսելով գրքի ժանրի մասին, ասել է, որ պատմական իրադարձությունները գեղարվեստական եւ գիտական գրականության մեջ ներկայացվում են բավական ծավալուն, իսկ պատկերապատումներով հեշտացվում է հանրայնացման գործը:
«Նեմեսիս գործողությունը. Սողոմոն Թեհլերյան» գիրքը հայերեն եւ ռուսերեն լույս է ընծայել «Արեգ» հրատարակչությունը՝ ՀՀ մշակույթի նախարարության աջակցությամբ եւ Փարիզի «Չոբանյան ինստիտուտի» օժանդակությամբ: Այն նվիրված է Հայոց ցեղասպանության 100-րդ տարելիցին:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: