Երեւան: Մեդիամաքս: UWC Dilijan քոլեջի նպատակներից մեկն է սովորեցնել տարբեր երկրներից եկած երեխաներին՝ լսել եւ հասկանալ միմյանց:
ԱյՍ մասին ասել է UWC Dilijan College-ի տնօրենների խորհրդի նախագահ Վիկտորիա Զոնաբենդը T&P օնլայն պարբերականին տված հարցազրույցում:
«UWC համակարգում երեխաները ավելի շատ հնարավորություններ են ստանում ինքնուրույն կրթվելու համար, դա վերաբերում է եւ ժամանակացույցի, եւ՛ պարապմունքների ինտենսիվության հարցում նրանց ազատությանը: Բացի լուրջ ակադեմիական ծանրաբեռնվածությունից, երեխաները պետք է պատրաստ լինեն միանգամայն այլ մակարդակի սոցիալական ակտիվության: Պատկերացրեք, որ գալիս եք անծանոթ երկիր, ապրում եւ սովորում եք այլ մշակույթների ներկայացուցիչների հետ, որոնց, հավանաբար երբեք չէիք հանդիպի: Հաճախ UWC քոլեջներ են գալիս ուսանողներ այնպիսի պետություններից, որոնք հակամարտության մեջ են գտնվում: Օրինակ մեզ մոտ ուսանում են Պաղեստինից եւ Իսրայելից ժամանած երեխաներ, Թուրքիայից, ինչը շատ անսովոր է հայկական դպրոցի համար, Սիրիայից, Աֆղանստանից, Պակիստանից, Հնդկաստանից, Իրանից եւ ԱՄՆ-ից: Եվ մեր նպատակներից մեկն է սովորեցնել նրանց լսել հակառակ կողմի կարծիքը, հասկանալ իրար եւ շփվել», - նշել է Վերոնիկա Զոնաբենդը:
«Իհարկե, երեխաները գալիս են տարբեր կյանքի փորձով: Նրանցից շատերը բավական համեստ կարողություններ ունեցող ընտանիքներից են, նույնիսկ կան փախստականների ճամբարներից եկածներ: Որոշ բաների նրանք պատրաստ են, որոշ բաների՝ ոչ: Սակայն փոփոխություններն արագ են տեղի ունենում: Օրինակ, Պաղեստինից եկած տղան շատ խիստ էր տրամադրված Իսրայելի ու իսրայելցիների նկատմամբ, սակայն այժմ հանգիստ շփվում է այդ երկրի ուսանողների հետ»,- ասել է քոլեջի տնօրենների խորհրդի ղեկավարը:
Վերոնիկա Զոնաբենդը
Լուսանկարը՝ Մեդիամաքս
Խոսելով առհասարակ կրթության ոլորտի մասին՝ Վերոնիկա Զոնաբենդը նկատել է, որ «գոյություն ունեցող կրթական համակարգը պետք է փոփոխվի, քանի որ այն չի խթանում ստեղծագործական մոտեցումը եւ հետաքրքրասիրությունն աշխարհի հանդեպ»:
«Կախվածությունը ստանդարտացված թեստավորման համակարգից, որը հիմնված է մի քանի տարբերակներից մեկն ընտրելու վրա, թույլ չի տալիս գործընթացին ստեղծագործական մոտեցում ցուցաբերել եւ ոչ ստանդարտ լուծումներ գտնել: Գլխավորը, ինչ պիտի նկատի ունենա կրթական համակարգը, այն է, որ բոլոր մարդիկ տարբեր են, եւ չկա ու չի կարող լինել բոլորի համար միայն մեկ ճիշտ լուծում»,- ասել է նա:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: