Գյումրիի թիվ 6 երաժշտական դպրոցի («Օկտետ») սաները հանդես են եկել համերգով UWC Dilijan քոլեջում:

1988 թվականի Սպիտակի երկրաշարժի հետեւանքով ավերված երաժշտական դպրոցի նոր շենքը կառուցվել էր Հայ օգնության ֆոնդի, Մեդիամաքսի եւ ավստրալիական Do Something կազմակերպության կողմից իրականացված Rock Aid Armenia/Armenia Grateful 2 Rock համատեղ նախագծի շրջանակներում՝ բրիտանական ռոքի լեգենդներ Իէն Գիլանի եւ Թոնի Այոմիի ակտիվ մասնակցությամբ:

Դպրոցի նոր շենքի բացման արարողությունը տեղի ունեցավ 2013 թվականի սեպտեմբերին ՀՀ նախագահ Սերժ Սարգսյանի, Իէն Գիլանի, Rock Aid Armenia-ի հիմնադիր Ջոն Դիի մասնակցությամբ: Նույն այդ ժամանակ Իէն Գիլանը եւ Ջոն Դին այցելեցին UWC Dilijan-ի շինհրապարակ, որն իր առաջին ուսանողներին ընդունեց 2014թ. սեպտեմբերին:

2015թ. ընթացքում Գյումրիի թիվ 6 երաժշտական դպրոցի սաները Հայ օգնության ֆոնդի աջակցությամբ հանդես եկան Հայոց ցեղասպանության 100-ամյակին նվիրված համերգաշարով: Համերգներ կայացան Գյումրիում, Էջմիածնում, Չարենցավանում, Ստեփանավանում եւ Հովհաննես Թումանյանի հայրենիքում՝ Դսեղ գյուղում:

UWC Dilijan-ում կայացած համերգը վերջինն էր ընթացիկ տարում, սակայն դպրոցի ղեկավարությունը նախատեսում է շարունակել համերգները նաեւ 2016 թվականին:

Համերգի մեկնարկից առաջ Հայ օգնության ֆոնդի ներկայացուցիչ Մարգարիտ Փիլիպոսյանը UWC Dilijan-ի ուսանողներին եւ դասախոսներին ներկայացրել է դպրոցի վերակառուցման պատմությունը: