ԵԱՀԿ երեւանյան գրասենյակի ապագան անորոշ է - Mediamax.am

exclusive
11557 դիտում

ԵԱՀԿ երեւանյան գրասենյակի ապագան անորոշ է


Երեւանում ԵԱՀԿ գրասենյակի ղեկավար Արգո Ավակովը
Երեւանում ԵԱՀԿ գրասենյակի ղեկավար Արգո Ավակովը

Լուսանկարը` http://www.osce.org/


Երեւան: Մեդիամաքս: Մեդիամաքսը տեղեկություններ է ստացել այն մասին, որ խնդիրներ են առաջացել Երեւանում ԵԱՀԿ գրասենյակի գործունեության շարունակության հետ կապված:

Տեղեկությունները մեկնաբանելու խնդրանքով Մեդիամաքսը դիմել է Երեւանում ԵԱՀԿ գրասենյակ եւ Հայաստանի արտաքին գործերի նախարարություն:

 

Երեւանում ԵԱՀԿ գրասենյակից Մեդիամաքսին հայտնել են, որ «ԵԱՀԿ անդամ երկրները դեռ կոնսենսուսի չեն եկել կազմակերպության մի շարք դաշտային առաքելությունների մանդատը երկարաձգելու վերաբերյալ»:

 

«ԵԱՀԿ Նախագահությունը շարունակում է բանակցությունները՝ այդ հարցի շուրջ արագ համաձայնության հասնելու համար»,- ավելացրել են ԵԱՀԿ գրասենյակից:

 

Այստեղ նաեւ նշել են, որ ԵԱՀԿ այն դաշտային առաքելությունները, որոնց մանդատների երկարաձգման շուրջ քննարկումներ են ընթանում, շարունակում են բաց մնալ եւ իրականացնել վարչական, մանդատի հետ չառնչվող աշխատանքներ:

 

Հայաստանի ԱԳՆ-ն ձեռնպահ մնաց մեկնաբանություններից:

 

Մեդիամաքսի տեղեկություններով, ստեղծված իրավիճակի հետ անմիջական առնչություն ունի Ադրբեջանը:

 

Նշենք, որ Հայաստանը միակ երկիրն է Հարավային Կովկասում, որտեղ կա ԵԱՀԿ գրասենյակ:

 

Բաքվում 2000 թվականի ամռանը բացված ԵԱՀԿ գրասենյակը իր գործունեությունն ավարտեց 2014թ. հունվարի 1-ին:

 

Թբիլիսիում 1992 թվականին բացված ԵԱՀԿ առաքելության մանդատը լրացավ 2008 թվականի դեկտեմբերի 31-ին:

 

Մեդիամաքսը նշում է, որ Երեւանում ԵԱՀԿ գրասենյակ բացելու որոշումը կայացվել էր կազմակերպության Մշտական խորհրդի նիստում՝ 1999թ. հուլիսին: Որոշման մեջ նշված է, որ ԵԱՀԿ եւ Հայաստանի փոխադարձ համաձայնությամբ, գրասենյակի գործունեության ժամկետն ամեն անգամ պետք է երկարացվի 12 ամսով:

 

2016 թվականի մարտից Երեւանում ԵԱՀԿ գրասենյակի ղեկավարն է ռուսաստանցի դիվանագետ, դեսպան Արգո Ավակովը:

Կարծիքներ

Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:




Մեր ընտրանին