Երեւան: Մեդիամաքս: Հայաստանի Ազգային պատկերասրահի տնօրեն Արման Ծատուրյանն այսօր խոսել է պատկերասրահի շենքային խնդիրների մասին:
Նա, մասնավորապես նշել է, որ չնայած շենքը ջեռուցվում է, միեւնույն է, տարածքում ցուրտ է, ինչը մեծ վնաս է հասցնում ներկայացված եւ պահեստներում պահվող արվեստի գործերի համար:
«Չեմ ուզում ծայրահեղ բաներ ասել, բայց եթե մի քիչ էլ հապաղենք, գուցե փրկելու բան էլ չունենանք: Դեպք է եղել, որ կտավն այնքան է վնասվել, որ հնարավոր չի եղել ցուցադրել այն: 9 հոգուց բաղկացած մեր ռեստավրացիայի բաժինը «խեղդված» աշխատում է», - ասել է տնօրենը:
«Պատկերասրահի հիմնական կառույցը բացարձակապես չի համապատասխանում ժամանակի մարտահրավերներին: Ունենք օր ու գիշեր աշխատող կաթսայատուն, սակայն տեսնում եք, թե ինչ ցուրտ է: Պատուհանները հին են, ձմռանը ցուրտ է, ամռանը՝ շոգ: Մեր ժառանգությունն ու հարստությունը վատ պայմաններում, պետք է անհապաղ միջոցներ կիրառել», - ասել է Արման Ծատուրյանը:
Նա ասել է, որ երկրի ղեկավարությունը ազգային պատկերասրահի նոր շենք կառուցելու ծրագիր ունի:
«Մենք դա շատ ենք ուզում, մեր փափագն է: Բայց երկիրը ծանր ֆինանսական վիճակում է ու եթե նոր շենք կառուցելու հնարավորություն չկա, միանշանակ պետք է սկսել պահպանման աշխատանքներ իրականացնել», - նկատել է պատկերասրահի տնօրենը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: