Մոսկովյան արվեստասերները հնարավորություն ունեն ծանոթանալու հայկական իմպրեսիոնիզմին: Մարտի 25-ին Մոսկվայի Ռուսական իմպրեսիոնիզմի թանգարանում բացվելու է «Հայկական իմպրեսիոնիզմ. Մոսկվայից մինչեւ Փարիզ» խորագրով ցուցահանդեսը:

Ինչպես նշում է artchive.ru կայքը, հսկայական լեռներով ու միջնադարյան եկեղեցիների խիստ գեղեցկությամբ, ավանդական խոհանոցով ու կոնյակով, Արշիլ Գորկու սքանչելի կտավներով ու Սերգեյ Փարաջանովի կինոպատկերներով հայտնի Հայաստանն աշխարհին ներկայանում է նորովի:

19-րդ դարի վերջին եւ 20-րդ դարի սկզբին հայկական իմպրեսիոնիզմի՝ որպես ուրույն երեւույթի ձեւավորման համար կարեւոր է եղել այս ուղղության հիմնադիր ֆրանսիացի նկարիչների դերը, նրանց մոտեցումը գույնին, տեխնիկային, թեմաներին:

Ռաֆայել Շիշմանյան, Դաշտային տեսարան (Խոտադեզեր դաշտում) (1913)

 

Հայկական արվեստի զարգացման մեջ աննշան չէ նաեւ ռուսական գեղանկարչական դպրոցի դերը: Հայ շատ նկարիչներ սովորել են Մոսկվայում եւ Պետերբուրգում՝ ժամանակի առաջատար ռուս վարպետների՝ Վասիլի Պոլենովի, Կոնստանտին Կորովինի, Վալենտին Սերովի մոտ: Բայց հայ նկարիչների բոցավառ սերն ու կապվածությունը ազգային բազմադարյա մշակույթին, հարազատ երկրի գեղեցկությանը, քաղաքային եւ գյուղական տեսարաններին առանձնահատուկ են դարձնում հայկական իմպրեսիոնիզմը:

Թանգարանի այցելուներին կներկայացվեն աշխարհահռչակ Մարտիրոս Սարյանի, հայ արվեստի առանցքային կերպարներից Եղիշե Թադեւոսյանի, նուրբ եւ քնարական նկարիչ Սեդրակ Առաքելյանի, Վահրամ Գայֆեճյանի եւ այլ ականավոր նկարիչների աշխատանքներ: Դրանք տրամադրել են Հայաստանի Ազգային պատկերասրահը, Երեւանի Ռուսական արվեստի թանգարանը: Որոշ գործեր վերցված են մասնավոր հավաքածուներից:

Եղիշե Թադեւոսյան, Հանճարը և ամբոխը (1909)

 

Ցուցադրության համար հրատարակվելու է պատկերազարդ կատալոգ, որում տեղ են գտնելու ոչ միայն հոդվածներ հայկական իմպրեսիոնիզմի՝ որպես գեղարվեստական երեւույթի մասին, այլեւ ցուցադրված վարպետների կենսագրական ակնարկներն ու նրանց ստեղծագործությունների մասին հետաքրքիր փաստեր:

Ցուցադրությունն ուղեկցվելու է դասախոսություններով, թեմատիկ քննարկումներով, երաժշտական երեկոներով եւ էքսկուրսիաներով:

Ցուցահանդեսը կգործի մինչեւ այս տարվա հունիս 4-ը:

Պատրաստել է Լուսինե Ղարիբյանը