Երեւան: Մեդիամաքս: Երեւանում այսօր շարունակվում է Դավոսի Հաղորդակցության համաշխարհային ֆորումի տարածաշրջանային նիստը՝ WCFDavos/Yerevan երկօրյա ֆորումը, որը կրում է «Ճգնաժամից դեպի զարգացում՝ սնուցվելով հաղորդակցությամբ» խորագիրը։

Միջոցառման այսօրվա նիստում կքննարկվեն երկրի բրենդինգի եւ համայնքային զարգացման խնդիրներ, որոնց ժամանակ ելույթով հանդես կգան ինչպես հայաստանցի, այնպես էլ օտարերկրյա առաջատար փորձագետներ:

Տարածաշրջանում իր ձեւաչափով առաջին անգամ անցկացվող ֆորումի շրջանակներում քննարկումներն անցկացվում են 5 հիմնական նիստերի ընթացքում, որտեղ ելույթ ունեցողները անդրադառնում են ճգնաժամային հաղորդակցության, սոցիալական մեդիաների, կորպորատիվ պատասխանատվության, ազգային բրենդինգի եւ համայնքային զարգացման խնդիրներին:

Ֆորումի աշխատանքներին մասնակցում են ինչպես ոլորտային առաջատար մասնագետները Հայաստանից, այնպես էլ հյուրեր աշխարհի տարբեր երկրներից:

Միջոցառումը կազմակերպել են Հասարակայնության հետ կապերի հայաստանյան ասոցիացիան (APRA) եւ Դավոսի հաղորդակցության համաշխարհային ֆորումի ասոցիացիան (World Communication Forum Association)։