Երեւան: Մեդիամաքս: ՀՀ արտակարգ իրավիճակների նախարար Դավիթ Տոնոյանն այսօր ընդունել է Հայաստանում Չինաստանի արտակարգ եւ լիազոր դեսպան Թիան Էրլունի եւ Չինաստանի սեյսմիկ վարչակազմի փոխտնօրեն Ջաո Հեպինի գլխավորած պատվիրակությանը:
ԱԻՆ-ում նշել են, որ հանդիպման ընթացքում քննարկվել է համագործակցությունը երկու պետությունների միջեւ սեյսմիկ պաշտպանության ոլորտում:
Կողմերը քննարկել են Հայաստանին եւ Չինաստանին բնորոշ ընդհանուր աղետի՝ երկրաշարժին բնակչության պատրաստվածության եւ դիմակայունության մակարդակի բարձրացման համատեղ հնարավորությունները:
Պայմանավորվածություն է ձեռք բերվել նախկինում ստորագրված Փոխըմբռնման հուշագրի շրջանակում կազմել սեյսմիկ ոլորտում համագործակցության ընդհանուր ծրագիր, որը ներառելու է երկրաշարժերի կանխատեսման եւ սեյսմիկ մոնիթորինգի կազմակերպման ոլորտներում չինական փորձի ուսումնասիրություն, Սեյսմիկ պաշտպանության ծառայության Ազգային դիտացանցի արդիականացում եւ տեխնիկական օժանդակություն, շենքերի սեյսմիկ խոցելիության գնահատման փորձի փոխանակում, մասնագետների վերապատրաստում:
Նախնական պայմանավորվածություն է նաեւ ձեռք բերվել կիրառել Չինաստանի փորձը արբանյակների օգնությամբ գեոդեզիական ուսումնասիրություններ իրականացնելու համար:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: