Երեւան: Մեդիամաքս: ԼՂՀ պաշտպանության նախարար Մովսես Հակոբյանն ասել է, որ «մեր սահմանների փոփոխություն տեղի չի ունենալու, իսկ լինելու դեպքում դա կլինի Ադրբեջանի տարածքային ամբողջականության հաշվին»:
Այս մասին Մովսես Հակոբյանն ասել է Արցախի հանրային հեռուստատեսությանը տված հարցազրույցում:
«Առաջապահ ստորաբաժանումներն իրենց գործողությունները կատարում են գերազանց: Այս պահի դպրությամբ եւ հետագայում առաջնագիծն անխախտելի է եւ որեւէ մեկը չի կարող այդ սահմանագիծը փոխել մեկ ուրիշ բնագծի հետ»,-ասել է նա:
Նախարարը նշել է, որ վերջին օրերի գործողությունները վկայում են, որ «բանակցային գործընթացում ունենալով անհաջողություն` հակառակորդը փորձում է ապակայունացնել իրավիճակը»:
ՊԲ հրամանատարը նկատել է, որ հակառակորդի բոլոր գործողություններն իրականցում է միայն մեկ ստորաբաժանում, մյուսները պասիվ են: Նա նշել է, որ «հակառակորդին հետ շպրտելուց բացի, ՊԲ հատուկ ստորաբաժանումներն իրականացրել են նաեւ որոշակի պատժողական գործողություններ»:
Հակառակորդի ակտիվացման պատճառներից մեկը Մովսես Հակոբյանը համարել է նոր պաշտպանության նախարարի նշանակումն ու նրա «կայանալու» փորձերը:
«Ադրբեջանի հասարակությունը պետք է հասկանա, որ իր ղեկավարության արկածախնդրության պատճառով ընդամենը զոհերի քանակն է ավելանում»,-ասել է նախարարը եւ նկատել, որ դատելով վերջին իրադարձություններից` հակառակորդը նույնն է մնացել, ընդամենը սպառազինության որոշակի տեսակներ է փոխվել:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: