Ապրիլի 2-ից 8-ը ադրբեջանական բանակը Արցախի երկնքում կորցրել է 15 անօդաչու թռչող սարք (ԱԹՍ):
Դրանցից մի քանիսը հարվածային կամ ինքնաոչնչացող (կամիկաձե) ԱԹՍ-ներն էին, որոնք Ադրբեջանը գնել էր Իսրայելից:
Հասարակությունում եւ մամուլում ակտիվ է քննարկում է սկսվել այն մասին, որ հայկական կողմը եւս պետք է ունենա ժամանակակից ԱԹՍ եւ կարծիքներ են հնչում այն մասին, որ դրանք կարող են արտադրվել հենց Հայաստանում:
Հայկական Instigate Robotics ՏՏ ընկերությունը երկար տարիներ զբաղվում է անօդաչուների ծրագրային եւ տեխնիկական մասի մշակումներով: Ընկերության համահիմնադիր ու գլխավոր ինժեներ Վահագն Պողոսյանը Մեդիամաքսին պատմել է իրենց անօդաչուների ու բանակի հետ հնարավոր համագործակցության մասին:
Instigate-ի գլխավոր ինժեներ Վահագն ՊողոսյանըԼուսանկարը` www. be-armenia.com
«Անօդաչուները սովորաբար տանում են օգտակար բեռ, մեծ մասամբ` տեսախցիկ: Ռազմական ոլորտում անօդաչուներն օգտագործվում են հետախուզության եւ հրետանու կրակի կառավարման համար: Մեր ներկա մշակումները քաղաքացիական օգտագործման համար են, բայց անհրաժեշտ աշխատանք կատարելուց հետո կարող ենք նաեւ ռազմական մոդելներ արտադրել»,- Մեդիամաքսին ասել է Վահագն Պողոսյանը:
Instigate-ի անօդաչուն նախագծված Սինգապուրի համարԼուսանկարը` Instigate Robotics
Նրա խոսքով` 2011-ից սկսած բազմիցս փորձել են համագործակցել պաշտպանության նախարարության հետ, հանդիպումներ ու քննարկումներ են կայացել Instigate-ի ներուժը Հայաստանի ռազմական համալիրի արդիականացմանն ուղղելու համար, սակայն գործնական քայլեր չեն հետեւել:
«Հիմա համագործակցում ենք Սինգապուրի հետ: Այդ երկրի սահմանապահ ծովային ոստիկանական զորքերի համար Instigate-ը մշակում է անօդաչու թռչող սարքի մի մոդել, որը 2017-ին, ամենայն հավանականությամբ, կիրառության մեջ կմտնի նավահանգիստները երկնքից տեսանկարահանելու համար», - պատմել է Վահագն Պողոսյանը:
«Մեր սարքերի առավելությունը ցամաքից էլեկտրականության սնուցումն է: Եթե էլեկտրական շարժիչներով սարքերը սահմանափակ թռիչքային ժամանակ ունեն, ապա մեր մշակումները կարող են օդում մնալ որքան հարկավոր է` անհրաժեշտ նկարահանումներ կատարելով», - հավելել է նա:
Վահագն Պողոսյանը Մեդիամաքսին ասել է, որ ՀՀ ՊՆ հետ պայմանավորվածություն ունենալու դեպքում կարող են ռազմական անօդաչու սարքերի ամենատարբեր մշակումներ կատարել նաեւ հայկական ԶՈՒ համար: Նա նկատել է, որ դրանց գինը, Հայաստանում արտադրելու դեպքում, զգալիորեն էժան կլինի միջազգային շուկայում առկա առաջարկներից:
Սուրեն Ստեփանյան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: