Երեւան: Մեդիամաքս: ՀՀ կառավարությունն այսօր հաստատել է «Արարատ Գրուպ» ընկերության հայտը «ժամանակավոր ներմուծում» արտոնյալ հարկային ռեժիմի տրամադրման մասին:
Ինչպես այսօր կառավարության նիստում հայտնել է ՀՀ էկոնոմիկայի նախարար Տիգրան Դավթյանը, «Արարատ Գրուպ» ընկերությունը մտադիր է մինչեւ 2015թ. կատարել $ 27 մլն ծավալի ներդրումներ:
Նրա խոսքերով, ընկերությունը կզբաղվի հանքային ջրերի արտադրությամբ, գյուղատնտեսական ապրանքների վերամշակմամբ եւ արտահանմամբ: Տիգրան Դավթյանը տեղեկացրել է, որ ընկերությունը մտադիր է ապահովել շուրջ 220 աշխատատեղ:
Էկոնոմիկայի նախարարն ասել է, որ ձեռնարկության տեխնիկական գործարկումը կկայանա 2011թ. հունիս-հուլիս ամիսներին, իսկ արտադրությունը լիովին կծավալվի մինչեւ տարեվերջ:
Նրա խոսքերով, կառավարությունը կշարունակի ներդրումային ծրագրերին աջակցելու քաղաքականությունը: «Նախարարության քննարկմանը ներկայացված են շուրջ 60 ներդրումային ծրագրեր: Այս տարի տարբեր ոլորտի 4 ընկերություններ արդեն արտոնություններ են ստացել նոր ներդրումների, սարքավորումների ներմուծման համար, ինչը կհանգեցնի զգալի առաջխաղացումների իրական հատվածում»,- ասել է Տիգրան Դավթյանը:
