Երեւան: Մեդիամաքս: Հայաստանի նախագահ Սերժ Սարգսյանն այսօր երեկոյան աշխատանքային այցով կմեկնի Մեծ Բրիտանիայի եւ Հյուսիսային Իռլանդիայի Միացյալ Թագավորություն:
Ինչպես հաղորդում է նախագահի մամուլի ծառայությունը, հանրապետության նախագահը կմասնակցի Նյուպորտում սեպտեմբերի 4-ին կայանալիք ՆԱՏՕ-ի անդամ ու Աֆղանստանում միջազգային անվտանգության աջակցության ուժերի /ISAF/ առաքելության մասնակից գործընկեր երկրների եւ կառավարությունների ղեկավարների հանդիպմանը, որն անցկացվելու է Հյուսիսատլանտյան դաշինքի գագաթնաժողովի շրջանակներում: Այնտեղ Սերժ Սարգսյանը հանդես կգա ելույթով:
ՆԱՏՕ-Անվտանգության աջակցության միջազգային ուժեր ձեւաչափով վերջին այս hանդիպմանը կամփոփվեն Աֆղանստանում միջազգային անվտանգության աջակցության ուժերի առաքելության արդյունքները եւ կնախանշվեն նոր՝ «Հաստատակամ աջակցություն» առաքելության ուղղությունները:
Հայաստանը, 2010 թվականից ի վեր լինելով միջազգային այդ առաքելության մասնակից եւ միջազգային ուժերի կազմում տեղակայելով մինչեւ 126 հոգանոց զորախումբ, իր ներդրումն է ունեցել Աֆղանստանում անվտանգության ու ներազգային համերաշխության հաստատման ուղղությամբ գործադրվող միջազգային հավաքական ջանքերին եւ հանձնառու է շարունակելու մասնակցությունը նոր առաքելության շրջանակներում:
Սեպտեմբերի 4-ի երեկոյան հանդիպման մասնակիցների համար կտրվի ընդունելություն Ուելսի արքայազն Չարլզի անունից եւ ոչ պաշտոնական ընթրիք՝ ի պատիվ մասնակից երկրների եւ միջազգային կազմակերպությունների ղեկավարների:
Մեդիամաքս-ը հիշեցնում է, որ 2012 թ-ին Չիկագոյում կայացած ՆԱՏՕ-ի գագաթնաժողովին Հայաստանը մասնակցել էր արտաքին գործերի նախարարի մակարդակով: Այդ ժամանակ Հայաստանի նախագահը որոշել էր չմասնակցել գագաթնաժողովին ՝ համաժողովի հռչակագրի նախագծում ներառված մտահոգիչ ձեւակերպումների պատճառով։ Հռչակագրի նախագծում, մասնավորապես, ներառված էր Հարավային Կովկասում հակամարտությունների լուծման վերաբերյալ ընդհանրական ձեւակերպում, որը հակասում է ղարաբաղյան հիմնախնդրի կարգավորման միջազգային միջնորդական մանդատ ունեցող Մինսկի խմբի համանախագահների մոտեցումներին։
Մեդիամաքս-ի տեղեկություններով, այս տարի եւս Հայաստանի մասնակցության ձեւաչափի վերաբերյալ որոշման ընդունումը ձգձգվել է Ուելսի հռչակագրի տեքստում հակամարտությունների վերաբերյալ դրույթների հստակեցման նկատառումով:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: