Երեւան: Մեդիամաքս: ՀՀ արտգործնախարար Էդվարդ Նալբանդյանը հայտարարել է, որ ցեղասպանությունների կանխարգելումը պահանջում է քաղաքակիրթ աշխարհի մշտական ուշադրությունը՝ առանց ստորադասելու այն աշխարհաքաղաքական հաշվարկներին:
Այս մասին նա ասել է մարտի 3-ին՝ ելույթ ունենալով ՄԱԿ-ի Մարդու իրավունքների խորհրդի 28-րդ նստաշրջանին:
«Ահաբեկիչների կողմից սիրիական Դեյր Զոր քաղաքի Սրբոց Նահատակաց հայկական եկեղեցու ավիրումը, որը Հայոց ցեղասպանության բազմաթիվ զոհերի մասունքներն ամփոփող սրբատեղի էր, ցավալի, բայց, միեւնույն ժամանակ, խորհրդանշական կապ է մարդկության դեմ անցյալում եւ այսօր գործած հանցագործությունների միջեւ»,- ասել է ՀՀ արտաքին քաղաքական գերատեսչության ղեկավարը:
Անդրադառնալով Ցեղասպանության կանխարգելման վերաբերյալ Հայաստանի ներկայացրած բանաձեւին՝ նա ասել է, որ Մարդու իրավունքների խորհուրդը էական դեր է խաղացել պետությունների՝ Ցեղասպանության մասին կոնվենցիայից բխող պարտավորություններն ուղղորդելու՝ մարդու իրավունքների համակարգված պաշտպանության եւ ցեղասպանությունների կանխարգելման բանաձեւերի ընդունման գործում:
«Այս տարի Հայաստանը կրկին նախաձեռնել է ցեղասպանությունների կանխարգելման բանաձեւ: Առկա է միջազգային հանրության աճող համաձայնությունն առ այն, որ ցեղասպանությունների կանխարգելումը մշտապես պահանջում է քաղաքակիրթ աշխարհի մշտական ուշադրությունը եւ առավելագույն ջանքերը՝ առանց ստորադասելու այդ վեհ գաղափարը աշխարհաքաղաքական հաշվարկներին: Միջազգային հանրության բոլոր անդամները պետք է միասնական լինեն` ցեղասպանության հանցագործությունը կանխարգելելու իրենց ջանքերում, եւ մենք կոչ ենք անում բոլոր անդամ-պետություններին սատարելու այս բանաձեւը, այնպես, ինչպես արվեց երկու տարի առաջ»,- ասել է Էդվարդ Նալբանդյանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: