exclusive
16221 դիտում

Պատրիկ Դերհեմ. Հայաստանի ամենամեծ արժեքը մարդկային կապիտալն է

Պատրիկ Դերհեմը
Պատրիկ Դերհեմը

Լուսանկարը` Financial Times


«Այբ» կրթական հիմնադրամի հրավերով Վեստմինստերի դպրոցի տնօրեն Պատրիկ Դերհեմը այցելել էր Հայաստան:

Այցը նախաձեռնվել էր հայաստանյան դպրոցներում «Արարատյան Բակալավրիատ» կրթական ծրագրի ներդրման շրջանակներում՝ համագործակցության եւ փորձի փոխանակման նպատակով: Հայաստանում Պատրիկ Դերհեմն այցելել է «Այբ» դպրոց, UWC Dilijan քոլեջ, Դիլիջանի կենտրոնական դպրոց, «Թումո» ստեղծարար տեխնոլոգիաների կենտրոն, Հայաստանում Ամերիկյան համալսարան եւ ծանոթացել է ինովացիոն ծրագրերին եւ բարեփոխումներին:

Մեդիամաքսը զրուցել է Պատրիկ Դերհեմի հետ:

- Սրանք իմ լավագույն 6 օրերն էին: Այցը գերազանցեց սպասելիքներս: Կատարյալ հաճույք էր հանդիպել բոլոր այդ հրաշալի մարդկանց եւ առնչվել արտասովոր պատմության, մշակույթի եւ ժառանգության հետ: Սա իմ առաջին այցն է Հայաստան, բայց ոչ վերջինը:

Երկու դրվագներից մեկը, որ երբեք չեմ մոռանա, Հայոց Ցեղասպանության թանգարան այցն էր: Այն խորապես հուզեց ինձ: Մյուս անմոռանալի բանն էլ ՝ մարդկանց հետ զրույցներն են. նրանցից յուրաքանչյուրը պատմելու բան ունի: Անհամբեր սպասում եմ հաջորդ այցին:

Ինձ հատկապես հետաքրքրեց «Այբ» դպրոցի նախաձեռնած անչափ տպավորիչ «Արարատյան Բակալավրիատը»: Ծրագիրն իրականացվել է Քեմբրիջի համալսարանի հետ համատեղ եւ դա հսկայական նախաձեռնություն է: Իմ կարծիքով, բոլոր այն հայերի համար, ովքեր կօգտվեն այս հնարավորությունից, այն կատարյալ կլինի ՝ոչ միայն կապելով նրանց հայկական մշակույթին, այլեւ տեղեկացված դարձնելով համաշխարհային մակարդակով:

UWC Dilijan քոլեջի տնօրեն Դենիզ Դեւիդսոնը, Դիլիջանի կենտրոնական դպրոցի տնօրեն Արամ Մեհրաբյանը եւ Պատրիկ Դերհեմը UWC Dilijan քոլեջի տնօրեն Դենիզ Դեւիդսոնը, Դիլիջանի կենտրոնական դպրոցի տնօրեն Արամ Մեհրաբյանը եւ Պատրիկ Դերհեմը

Լուսանկարը` Այբ հիմնադրամ


Շատ տպավորված եմ այն ամենով, ինչ տեսել եմ: Լավ տեղեկացված չեմ այն մասին, թե ինչ է կատարվում այլ դպրոցներում, հաջորդ այցիս ընթացքում ավելի մանրամասն կուսումնասիրեմ:

Հայաստանում ինձ անչափ տպավորել են մարդիկ: Կասկած չկա, որ Հայաստանի ամենամեծ արժեքը մարդկային կապիտալն է, ինքնությունը, որը բխում է մշակույթից, եկեղեցուց, դարեր շարունակ երկրի վերապրած փորձությունների գիտակցումից: Հայաստանի համար շատ կարեւոր է պահել դա:

- Վեստմինստերի դպրոցում կա՞ն դասավանդող կամ սովորող հայեր:

- Մեր դպրոցում հայազգի ուսուցիչներ չկան, բայց մի ուսանող տղա ունենք, ով Հայաստանից կժամանի սեպտեմբերին: Դա հրաշալի է: Նախկինում հայ ուսանողներ ունեցել ենք, բայց նրանք հիմնականում Սփյուռքից էին:

- Կրթական համակարգի զարգացմանն ուղղված որեւէ առաջարկություններ ունե՞ք:

- Դա ամենադժվար հարցերից մեկն է, որի հետ առնչվում ենք ամբողջ աշխարհում: Այն վերաբերում է կրթության զարգացմանը՝ թե պետական եւ թե հասարակական մակարդակով եւ չունի հեշտ լուծում: Եթե որեւէ մեկը ունենար այդ լուծումը, բոլորս կօգտվեինք դրանից, սակայն առանցքային եւ թերեւս միակ բանը, որի շուրջ կրթական ոլորտի մասնագետները միաձայն են, կայանում է նրանում, որ ուսուցչի որակը շատ բան կարող է փոխել:

Ուսուցչի եւ աշակերտների հաղորդակցությունը լսարանում շատ կարեւոր է: Բոլորիս համար, անկախ այն բանից, թե աշխարհի որ ծայրում ենք, լուծումը կայանում է լավագույն ուսուցիչների գտնելու մեջ, համոզված լինելով, որ նրանք գիտակցում են, որ կրթությունը ամբողջ կյանքի ընթացքում սովորելու գործընթաց է եւ կատարելագործվելու անհրաժեշտությունը միշտ էլ կա:

Պետք է քրտնաջան աշխատել, որպեսզի գտնել լավագույն ուսուցիչներին: Աշխատանքային ծանրաբեռնվածության եւ վարձատրության խնդիրները լուրջ են: Պետք է համոզված լինես, որ ուսուցիչները բավականաչափ աշխատավարձ են ստանում:

Երիտասարդների հետ աշխատելուց եւ նրանց ողջ կյանքի ընթացքում սովորելու ճանապարհով ուղղորդելուց ավելի լավ աշխատանք չկա: Ինձ բախտ է վիճակվել ունենալ նման մասնագիտություն, շուրջ երեսուն տարի աշխատելով այն երիտասարդների հետ, ովքեր այժմ փոխում են աշխարհը:

- Տեխնոլոգիաները մեր օրերում մեծ դեր են խաղում դասասենյակներում: Ի՞նչ փոփոխություններ եք տեսնում ուսուցիչների եւ աշակերտների շփման մեջ:

- Պատշաճ կերպով օգտագործելու դեպքում տեխնոլոգիաները կարող են շատ օգտակար լինել, սակայն դրանք չեն կարող փոխարինել ուսուցիչներին: Դասավանդելու լավագույն օրինակները նրանք են, որոնք համատեղում են տեխնոլոգիաների օգտագործումը:

Կրթությունը բարդ գործ է, նոր բաներ սովորելու համար պետք է մտածել: Մտածելը մարտահրավերներով լի է, բայց երիտասարդներին նման հմտություններ փոխանցելը կարեւոր է:
Դիլիջանի կենտրոնական դպրոցի տնօրեն Արամ Մեհրաբյանը, Այբ դպրոցի տնօրեն Արամ Փախչանյանը եւ Պատրիկ Դերհեմը Դիլիջանի կենտրոնական դպրոցի տնօրեն Արամ Մեհրաբյանը, Այբ դպրոցի տնօրեն Արամ Փախչանյանը եւ Պատրիկ Դերհեմը

Լուսանկարը` Այբ հիմնադրամ


Տեխնոլոգիաները կարող են օգտակար լինել, բայց պետք է համոզված լինել, որ երիտասարդներին սովորեցնում են գտնել հակասություններ: Միայն այն պատճառով, որ Wikipedia-ն թիվ մեկ արդյունքն է Google-ի որոնման մեջ դեռ չի նշանակում, որ այն միշտ ճշգրիտ տեղեկատվություն է պարունակում՝ երիտասարդները պետք է ստուգեն հակասությունները եւ քրտնաջան աշխատեն իրենց կարծիքը հիմնավորող ապացույցները գտնելու եւ գնահատելու համար: Ահա թե ինչում է կրթության առաքելությունը: Այն ընդգրկում է հարցնելու մշակույթի՝ ճիշտ հարցեր տալու եւ մտածել սովորելու, զարգացումը:

- Ի՞նչ եք կարծում, այնպիսի հարթակները, ինչպիսիք են Coursera-ն, edX-ը, կարո՞ղ են փոխարինել դասական լսարանները:

- Ամեն ինչ հնարավոր է: Եթե մեր զրույցը լիներ 20-30 տարի անց, հավանաբար, մենք կունենայինք հստակ պատասխան: Այս պահին չգիտեմ: Առցանց ուսուցումը շատ հետաքրքիր հնարավորություն է, այն ապահովում է կրթության հասանելիությունը հասարակության բոլոր անդամների համար:

Նոր սերունդը վերապրում է անհավանական փոփոխություններ: Աշխարհը դարձել է լիովին այլ վայր, որը երիտասարդները բազմիցս փոխելու են: Եվ նրանք պարտավոր են ունենալ հմտությունների այդ պաշարը, ճկունությունը, դժվարություններին դիմակայելու տոկունություն՝ սրանք են դպրոցի կարեւորագույն տարրերը: Համոզված չեմ, որ դրանք կարելի է ձեռք բերել առցանց տարբերակով:

Լավագույն դպրոցներն այժմ խթանում են տեխնոլոգիաների կիրառումը: Լավագույն կրթական համակարգերը համադրում են ավանդույթները նորարարությունների հետ: Դա պետք է առողջ համադրություն լինի: Պետք չէ դադարել նորարարական լուծումներ ներդնել, պետք է անընդհատ զարգացման ուղիներ փնտրել:

Արհեստական բանականությունը, օրինակ, մոտակա տարիներին հետաքրքիր զարգացումներ կապրի կրթության տեսանկյունից:

Պատրիկ Դերհեմի հետ զրուցել է Նարինե Դանեղյանը

Կարծիքներ

Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:

Մեր ընտրանին
banks.am
itel.am
sport
bravo.am