Երեւան: Մեդիամաքս: ՌԴ արտաքին գործերի նախարար Սերգեյ Լավրովն այսօր Երեւանում հայտարարել է, որ «Ռուսաստանը շահագրգռված է ղարաբաղյան հակամարտության արագ կարգավորմամբ»:
ՀՀ արտաքին գործերի նախարար Էդվարդ Նալբանդյանի հետ համատեղ ասուլիսում Լավրովը հայտարարել է, որ «Ռուսաստանը սատարում է բոլոր այն ջանքերին, որոնք կարագացնեն այդ ճգնաժամի կարգավորումը»:
«Որքան հաճախ տեղի ունենան երկու նախագահների հանդիպումները, այնքան ավելի դինամիկ կլինի բանակցային գործընթացը»,- ասել է Սերգեյ Լավրովը:
Նա նաեւ նշել է, որ բազային լուծումն ընկած է Ռուսաստանի, ԱՄՆ-ի եւ Ֆրանսիայի առաջնորդների վերջին տարիներին ընդունված՝ Ղարաբաղին վերաբերող հայտարարությունների հիմքում:
ՌԴ արտաքին գործերի նախարարը կարեւորել է անհրաժեշտ չափանիշների համաձայնեցումը եւ քայլերի հաջորդականությունը:
Էդվարդ Նալբանդյանը, իր հերթին, նշել է, որ «վերջին ժամանակաշրջանում Բաքուն դժգոհ է համանախագահների առաջարկներից, մասնավորապես, զինադադարի ամրապնդման, դիպուկահարների դուրսբերման եւ շփման գծում միջադեպերի հետաքննման մեխանիզմերի ստեղծման վերաբերյալ»:
«Այդ կոնկրետ առաջարկները, որոնք անում են համանախագահները եւ որոնք միտված են ղարաբաղյան հակամարտության բացառապես խաղաղ կարգավորմանը, այլընտրանք չունեն»,- ասել է Էդվարդ Նալբանդյանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: