Երեւան: Մեդիամաքս: Արցախի նախագահի մամուլի խոսնակ Դավիթ Բաբայանն այսօր ասել է, որ Արցախը վճռական է Քարվաճառում վնասազերծված ադրբեջանցի դիվերսանտների դատավարությունն անցկացնել ժողովրդավարական կանոններով:
Անդրադառնալով հոկտեմբերի 27-ին Ստեփանակերտում մեկնարկելիք դատավարությանը՝ Դավիթ Բաբայանն ասել է.
«Այդ մարդիկ կասկածվում են ծանր հանցագործություններ կատարելու համար: Մենք իրավական պետություն ենք եւ ստիպված ենք դատը կազմակերպել ինչպես վայել է ժողովրդավարական պետություններին` բաց ու թափանցիկ»,- ասել է նա եւ նկատել, որ «որքան էլ հասարակության համար հոգեբանորեն ծանր լինի, այդ մարդիկ, օրենքի համաձայն, կունենան պաշտպաններ»:
Խոսելով ճնշումների մասին` Դավիթ Բաբայանն ասել է, որ որեւէ ճնշում չի կարող ունենալ այն ազդեցությունը, որն ակնկալվում է ադրբեջանական կողմից.
«Ակնկալում ենք, որ այդ պետությունն ամեն ինչ կանի հանցագործության մեջ կասկածվող իր քաղաքացիներին պաշտպանելու համար. սա է հանցագործների օրենքը, ինչպես արեցին նաեւ Սաֆարովի դեպքում, բայց չեմ կարծում, որ դա որեւէ կերպ կհաջողվի»,- ասել է նա:
Անդրադառնալով այլ պետությունների կողմից հավանական ճնշումներին` Դավիթ Բաբայանն ասել է.
«Չեմ կարծում, որ քաղաքակիրթ երկրները կարող են նման ճնշումների գնալ ծանր հանցագործության համար մեղադրվող անհատների մեղքը թեթեւացնելու նպատակով: Սա որեւէ մեկին պետք չէ, անգամ կարող է ծանր հարված լինել հենց իրենց վարկանիշին»:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: