Երեւան: Մեդիամաքս: ՀՀ պաշտպանության նախարարի առաջին տեղակալ Դավիթ Տոնոյանն այսօր ՆԱՏՕ-ի կենտրոնակայանում հանդիպել է դաշինքի Գլխավոր քարտուղարի տեղակալ դեսպան Ալեքսանդր Վերշբոուի հետ:
Ինչպես հաղորդում են ՀՀ ՊՆ մամուլի ծառայությունից, Դավիթ Տոնոյանը ներկայացրել է ապրիլի սկզբին Ադրբեջանի կողմից Լեռնային Ղարաբաղի նկատմամբ իրականացրած ագրեսիայի մանրամասները՝ մասնավորապես նախապես պլանավորված նախահարձակ գործողությունները եւ այդ ընթացքում միջազգային մարդասիրական իրավունքի նորմերի խախտումներն ապացուցող հիմնավորումները:
Փոխնախարարը նշել է, որ Լեռնային Ղարաբաղի ինքնորոշման իրավունքը չի կարող կասեցվել ռազմական ուժի կիրառմամբ: Նա վերահաստատել է, որ համայն հայությունը մոբիլիզացված է եւ բոլոր միջոցներով կպաշտպանի այդ իրավունքը:
Դավիթ Տոնոյանն ընդգծել է, որ Լեռնային Ղարաբաղի ժողովուրդն իրավունք ունի ինքնապաշտպանվելու եւ բարելավելու իր անվտանգության միջավայրը:
Ալեքսանդր Վերշբոուն, բարձր գնահատելով Հայաստան-ՆԱՏՕ հարաբերությունների ներկայիս մակարդակը, հույս է հայտնել, որ այն կշարունակի պահպանել զարգացման դինամիկան:
Ապրիլի 22-ին Դավիթ Տոնոյանը կմասնակցի Հայաստան-ՆԱՏՕ «Պլանավորման եւ վերանայման գործընթաց» փաստաթղթի քննարկմանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: