Երեւան: Մեդիամաքս: Ստամբուլահայերին հաջողվել է կանխել Ստամբուլում նախկինում որպես մանկատուն ծառայած «Հայկական ճամբար» («Քեմփ Արմեն») պատմական շինության քանդումը:

Ինչպես գրում է թուրքական Sabah պարբերականը, «Հայկական ճամբար» կառույցի սեփականատեր Ֆաթիհ Ուլուսոյը հայտարարել է շինությունը հայ համայնքին փոխանցելու որոշման մասին:

Ստամբուլի Թուզլա թաղամասում գտնվող եւ տարիներ շարունակ ավերակների վերածված շինությունը պետք է քանդվեր սեփականատիրոջ ցանկությամբ, սակայն մայիսի սկզբից ակտիվիստները եւ մեծամասամբ քաղաքի հայ համայնքի ներկայացուցիչները բողոքի ցույցեր եւ նստացույցեր էին անցկացնում՝ արգելելով շինարարական տեխնիկայի մուտքը շինության տարածք:

Շինության պահպանման համար պայքարող «Նոր զարթոնք» հասարակական կազմակերպության անդամ Ալեքսիս Քալքը ողջունել է տարածքի սեփականատիրոջ որոշումը՝ հավելելով, որ շարունակելու են հետեւելու սեփականության փոխանցման գործընթացին, մինչեւ այն պաշտոնապես չավարտվի:

«Հայկական ճամբար»-ը 1974 թ. Թուրքիայի Գերագույն վերաքննիչ դատարանի որոշմամբ բռնագանձվել էր Ստամբուլի հայերից: Այն 1500 հայ մանուկների համար ծառայել է որպես մանկատուն:  Ըստ թուրքական թերթի տեղեկությունների՝ «Հայկական ճամբարում» իր կյանքի մի մասն է անցկացրել նաեւ հայազգի լրագրող, 2007թ. հունվարին թուրք ազգայնականի կողմից սպանված «Ակօս» թերթի խմբագիր Հրանտ Դինքը։