Երեւան: Մեդիամաքս: Չինաստանը պատրաստ է ֆինանսավորել Հայաստանում չինարենի խորացված ուսուցմամբ միջազգային դպրոց կառուցելու ծրագիրը:
Այդ մասին ասել է Հայաստանում Չինաստանի դեսպան Թիան Չանչունը ՀՀ կրթության նախարար Արմեն Աշոտյանի հետ հանդիպման ժամանակ:
Կրթության նախարարության հաղորդագրության համաձայն, Արմեն Աշոտյանը նշել է, որ չինարենի խորացված ուսուցմամբ դպրոցը լինելու է կրթության նախարարության ենթակայությամբ գործող դպրոց, որտեղ կկազմակերպվի չինարեն լեզվի, ինչպես նաեւ մշակույթի եւ պատմության ուսուցում:
Անդրադառնալով դպրոցի կառավարման կազմակերպմանը՝ նախարարը ներկայացրել է Հայաստանի դպրոցների կառավարման համակարգը՝ նշելով, որ չինական կողմը եւս կարող է ներգրավվել դպրոցի կառավարման գործընթացին՝ ունենալով իր ներկայացուցիչներին դպրոցի կառավարման խորհրդում:
Հայկական կողմն ակնկալում է չինացի մասնագետների աջակցությունը կրթական ծրագրերի ու ուսուցման մեթոդների հարցում:
«Չինական հրաշքի մասին ողջ աշխարհը հիացմունքով է խոսում: Ես հույս ունեմ, որ մենք համատեղ ջանքերով Հայաստանում, ի դեմս այս դպրոցի, կստեղծենք չինական փոքրիկ հրաշք»,- ասել է Արմեն Աշոտյանը:
Կողմերը նշել են, որ չինական դպրոցի նախագիծը ձեւի եւ բովանդակության առումով տարածաշրջանում եւ նախկին ԽՍՀՄ երկրների տարածքում բացառիկ կլինի եւ կարող է հետաքրքրություն առաջացնել նաեւ Հայաստանի սահմաններից դուրս:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: