Երեւան: Մեդիամաքս: ՀՀ քաղաքացի, 77-ամյա Մամիկոն Խոջոյանը, ով ավելի քան մեկ ամիս անց էր կացրել ադրբեջանական գերության մեջ եւ նախօրեին հայրենադարձվել է հայրենիք, ՀՀ իշխանությունների խնամքին է հանձնվել առողջական լուրջ խնդիրներով:
Ինչպես Մեդիամաքս-ին հաղորդել են ՀՀ պաշտպանության նախարարության մամուլի ծառայությունից, հայրենադարձվելուց հետո Մամիկոն Խոջոյանը տեղափոխվել է Իջեւանի բժշկակական կենտրոն, որտեղ անցկացված հետազոտությամբ նրա մարմնի վրա հայտնաբերվել են բազմաթիվ կապտուկներ, կոտրվածքներ եւ վնասվածքներ:
«Նշված վնասվածքների մասին չէր ասվել ադրբեջանական լրատվամիջոցների կողմից նախկինում հեռարձակված տեսանյութերում եւ հաղորդագրություններում, ինչը վկայում է, որ Մամիկոն Խոջոյանը վնասվածքները ստացել է ադրբեջանական կողմում գերության մեջ գտնվելու ժամանակահատվածում»,- հայտնել են պաշտպանական գերատեսչությունից:
Անցկացված բժշկական զննության արդյունքում կազմվել է արձանագրություն, կատարվում է հետաքննություն:
Մեդիամաքս-ը հիշեցնում է, որ մարտի 4-ին հայ-ադրբեջանական սահմանագծի հյուսիսարեւելյան հատվածում Կարմիր խաչի միջազգային կոմիտեի հովանու ներքո Հայաստան է վերադարձվել այս տարվա հունվարի 28-ին ադրբեջանական կողմում հայտնված ՀՀ քաղաքացի, Տավուշի մարզի Վերին Կարմիրաղբյուր գյուղի բնակիչ 77-ամյա Մամիկոն Խոջոյանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: