Երեւան: Մեդիամաքս: Հայաստանի Հանրապետական Կուսակցության քաղաքական դպրոցը կբացվի այս տարվա մայիսին, իսկ աշնանը ՀՀԿ-ն հանդես կգա նոր ծրագրով:

Այս մասին այսօր լրագրողների հետ հանդիպման ժամանակ ասել է կուսակցության փոխնախագահ Արմեն Աշոտյանը՝ նշելով, որ դպրոցը կրելու է Անդրանիկ Մարգարյանի անունը:

Դպրոցի պատասխանատու Արմեն Աշոտյանը նշել է, որ կառույցը գործելու է անվճար եւ նախատեսված է լինելու քաղաքական գործիչների, կուսակցության համակիրների ու քաղաքացիների համար:

ՀՀԿ փոխնախագահի խոսքով՝ դպրոցում դասավանդվող առարկաները թույլ կտան շարունակական եւ լրացուցիչ ծրագրերի միջոցով բարելավել կուսակցության անդամների ու համակիրների կազմակերպչական, ինտելեկտուալ եւ քաղաքական կարողությունները: Նրա փոխանցմամբ՝ կառույցում դասավանդելու են ինչպես ՀՀԿ անդամները, այնպես էլ ակադեմիական դասախոսները՝ անկախ կուսակցական պատկանելությունից:

«Մեր նպատակն է Հայաստանում զարգացնել քաղաքագիտական միտքը, ինչի անհրաժեշտությունն այսօր զգացվում է: Վստահ եմ, որ այս քաղաքական դպրոցը մի գեղեցիկ օր կդառնա ուղեղային՝ անալիտիկ մտքի կենտրոն: Այն մեծ ճանապարհի սկիզբն է, որը զարկ է տալու քաղաքագիտական, վերլուծական մտքի զարգացմանը»,-ասել է նա:

Անդրադառնալով ՀՀԿ նոր ծրագրի ստեղծմանը՝ Արմեն Աշոտյանը նշել է, որ ստեղծվել է համապատասխան աշխատանքային խումբը, որը ղեկավարում են ինքը եւ Մուշեղ Լալայանը:

«Մեր կուսակցության ծրագիրը վերջին անգամ վերանայվել է տասը տարի առաջ: Այժմ ի հայտ են եկել նոր մարտահրավերներ, փոխվել են մի շարք իրավիճակներ: Նոր ծրագիրը ոչ միայն համահունչ կլինի ներկային, այլեւ կուրվագծի ապագան՝ պահպանելով կուսակցության գաղափարական հենքը»,- ասել է ՀՀԿ փոխնախագահը:

Արմեն Աշոտյանը նշել է, որ նոր ծրագիրը կհաստատվի աշնանը կայանալիք համագումարի ժամանակ, իսկ մինչ այդ այն կքննարկվի կուսակցության մարզային եւ տարածքային կառույցների հետ: