Երեւան: Մեդիամաքս: Հայաստանում Ուկրաինայի դեսպան Իվան Կուխտան այսօր հայտարարել է, որ ո՛չ Հայաստանը, ո՛չ Ուկրաինան չեն տվել իրենց համաձայնությունը Երեւան-Սիմֆերոպոլ օդային ուղիղ թռիչքների իրականացման համար:
Ինչպես հաղորդում է Մեդիամաքս-ը, այսօր լրագրողների հետ հանդիպման ժամանակ, մեկնաբանելով Երեւան-Սիմֆերոպոլ թռիչքների իրականացման վերաբերյալ տեղեկությունները, Ուկրաինայի դեսպանն ասել է, որ այս հարցի քննարկման նպատակով հանդիպումներ է ունեցել ՀՀ արտաքին գործերի նախարարությունում եւ կառավարությանն առընթեր Քաղաքացիական ավիացիայի գլխավոր վարչությունում:
«Ինձ տեղեկացրել են, որ որեւէ մեկը թույլտվություն չի տվել Երեւան-Սիմֆերոպոլ չվերթ իրականացնելու համար: Չվերթներն իրականացվում են միջազգային նորմերի եւ երկկողմ համաձայնագրերի հիման վրա: Հայաստանի եւ Ուկրաինայի միջեւ իրականացվող բոլոր թռիչքները համաձայնեցվում են կողմերի միջեւ դիվանագիտական մակարդակով»,- ասել է Իվան Կուխտան:
Նախորդ շաբաթ «Գրոզնի ավիա» ավիաընկերության կոմերցիոն տնօրեն Սերգեյ Պետրովը Մեդիամաքս-ի թղթակցին հայտնել էր, որ նոյեմբերի 16-ից ավիաընկերությունը կսկսի պարբերական չվերթներ իրականացնել Սիմֆերոպոլ-Երեւան-Սիմֆերոպոլ ուղղությամբ:
Այնուհետեւ ՀՀ կառավարությանն առընթեր Քաղաքացիական ավիացիայի գլխավոր վարչությունը հերքել էր այդ տեղեկությունը:
Ի դեպ, Հայաստանում Մեծ Բրիտանիայի դեսպան Քեթրին Լիչն այսօր ասել է, որ իրենք չեն խրախուսում Երեւան-Սիմֆերոպոլ չվերթի իրականացումը, որը կարող է «օրինականացնել Ղրիմի իշխանությունները»:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: