Երեւան: Մեդիամաքս: ՀՀ արտգործնախարար Էդվարդ Նալբանդյանն այսօր ասել է, որ Հայաստանի եւ Եվրոպական միության միջեւ ստորագրվելիք համաձայնագիրը կսահմանի ընդլայնված գործընկերության նոր ուղենիշներ:
Այս մասին նա ասել է Վիշեգրադյան քառյակի եւ Արեւելյան գործընկերության մասնակից երկրների արտաքին գործերի նախարարների հանդիպմանը։
«Բրյուսելում առաջիկա գագաթաժողովին շոշափելի ձեռքբերումներ արձանագրելը կարեւոր կլինի Արեւելյան գործընկերության հետագա կենսունակության համար: Այս առումով մենք արժեւորում ենք ոլորտային համագործակցությանը քաղաքական լիցք հաղորդելու նախաձեռնությունը եւ ենթակառուցվածքային կապերի շուրջ քննարկումների վրա կենտրոնացումը»,- ասել է նախարարը:
Էդվարդ Նալբանդյանը հայտնել է, որ ենթակառուցվածքների փոխկապակցվածությունը պատշաճ տեղ է զբաղեցնում ինչպես Շրջանակային համաձայնագրում, այնպես էլ Հայաստանի եւ Եվրոպական միության միջեւ 2017-2022 թթ. գործընկերության ծրագրերում։
«Դրա շնորհիվ մենք կարող ենք արդյունավետորեն խթանել տարածաշրջանային կայունությունը եւ զարգացումը»,- ասել է ՀՀ ԱԳ ղեկավարը՝ ընդգծելով, որ փոխկապակցվածության գաղափարին պետք է անդրադառնալ նաեւ «ավելի լայն համատեքստում՝ տարբեր ինտեգրացիոն ձեւաչափերի միջեւ»։
«Եվրոպական միության եւ Եվրասիական տնտեսական միության միջեւ կապերը պետք է իրատեսական եւ կոնկրետ արդյունքների միտված երկխոսության մաս հանդիսանան։ Հայաստանը՝ որպես ԵԱՏՄ անդամ երկիր եւ Արեւելյան գործընկերության մասնակից, պատրաստ է այս առումով իր նպաստը բերել»,- հավելել է Էդվարդ Նալբանդյանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: