Երեւան: Մեդիամաքս: Այսօր Հայաստանում անցկացված exit-poll-ի արդյունքների համաձայն, ԱԺ ընտրություններում առաջատարներն են ՀՀԿ-ն, «Ծառուկյան» դաշինքը եւ «Ելք»-ը:

Exit-poll-ը ընտրատեղամասերից դուրս եկող քաղաքացիների հարցում է:

Այսօր այն ՀՀ ամբողջ տարածքում համապատասխան մեթոդաբանությամբ ընտրված 125 ընտրատեղամասերում անցկացրել են The Gallup Organization-ի եւ Հայկական սոցիոլոգիական ասոցիացիայի մասնագետները:

Տվյալները «Երկիր Մեդիա» հեռուստաընկերության եթերում ներկայացրել է Հայկական սոցիոլոգիական ասոցիացիայի նախագահ Գեւորգ Պողոսյանը: Դրանց համաձայն, ՀՀԿ-ն ստանում է 46 %, «Ծառուկյան» դաշինքը՝ 25 %, «Ելք»-ը՝ 10 %, ՀՅԴ-ն՝ 5 %:

Մնացած քաղաքական ուժերը ստացել են 3-4 %:

Մեդիամաքսը նշում է, որ 2013 թվականի նախագահական ընտրությունների ժամանակ The Gallup Organization-ը եւ Հայկական սոցիոլոգիական ասոցիացիան եւս անցկացրել էին exit-poll, որի արդյունքի համաձայն Սերժ Սարգսյանը ստացել էր  ընտրողների ձայների 58 %-ը, իսկ Րաֆֆի Հովհաննիսյանը՝ 32 %-ը: Այդ տվյալները քիչ էին տարբերվում Կենտրոնական ընտրական հանձնաժողովի պաշտոնական տվյալներից: