Երեւան: Մեդիամաքս: Այսօր եւ վաղը Երեւանում անցկացվում է Հայաստանի, Վրաստանի, Իրանի եւ Ռուսաստանի էներգետիկայի նախարարությունների համատեղ նիստը, որի շրջանակում ստորագրվել է տարածաշրջանային էներգետիկ համագործակցության զարգացման հեռանկարների վերաբերյալ քառակողմ հուշագիր:
ՀՀ վարչապետ Հովիկ Աբրահամյանն ընդունել է Երեւանում այս նպատակով գտնվող՝ Վրաստանի փոխվարչապետ, էներգետիկայի նախարար Կախա Կալաձեին:
Կախա Կալաձեի խոսքով՝ Հայաստանի, Վրաստանի, Իրանի եւ Ռուսաստանի միջեւ ստորագրված հուշագիրը նպաստավոր հիմքեր է ստեղծում տարածաշրջանային էներգետիկ համագործակցության զարգացման համար, եւ անհրաժեշտ է առավելագույն ջանքեր գործադրել՝ փոխշահավետ նախագծերը կյանքի կոչելու համար:
Հովիկ Աբրահամյանը, իր հերթին, կարեւորել է Հայաստան-Վրաստան 400 կՎ էլեկտրահաղորդման գծի կառուցումը, ինչպես նաեւ այլ համատեղ ծրագրերի իրականացումը: Նա ընդգծել է, որ քառակողմ հուշագրի ստորագրումը կնպաստի էլեկտրաէներգետիկ ոլորտում տարածաշրջանային համատեղ ծրագրերի իրագործմանը:
Կողմերն անդրադարձել են նաեւ երկկողմ առեւտրատնտեսական կապերի ընդլայնման հեռանկարներին:
Հիշեցնենք, որ ավելի վաղ Կախա Կալաձեն կոչ էր արել տարածաշրջանում միասնական էներգետիկ ցանց ստեղծել:
Մեդիամաքսի հարցազրույցը Կախա Կալաձեի հետ կարող եք կարդալ այստեղ:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: