Երեւան: Մեդիամաքս: ՀՀ նախագահ Սերժ Սարգսյանն այսօր ցավակցական հեռագիր է հղել Իրանի Իսլամական Հանրապետության նախագահ Հասան Ռոհանիին Թեհրանում՝ Մեջլիսի եւ Իմամ Խոմեյնիի դամբարանի վրա տեղի ունեցած ահաբեկչական հարձակումների եւ դրանց հետեւանքով զոհերի ու վիրավորների կապակցությամբ:

«Խստորեն դատապարտելով ահաբեկչության եւ ծայրահեղականության ցանկացած դրսեւորում՝ համոզված ենք, որ անհրաժեշտ է միասնականորեն պայքարել միջազգային այդ արհավիրքի դեմ:

Կարեւորելով մեր հարեւան եւ բարեկամ երկրում անվտանգությունն ու կայունությունը՝ վստահ եմ, որ Իրանի իշխանությունները ձեռնարկում են անհրաժեշտ բոլոր միջոցառումները նման գործողություններն իսպառ կանխարգելելու ուղղությամբ»,- ասված է ուղերձում:

Իրանում ՀՀ դեսպանությունն էլ տեղեկացրել է, որ հարձակումներից տուժածների շրջանում ՀՀ քաղաքացիների, հայերի առկայության մասին տեղեկատվություն չկա:

Դեսպանությունը ֆեյսբուքյան էջում տեղադրված հայտարարությամբ հորդորել է Իրանում գտնվող Հայաստանի քաղաքացիներին զերծ մնալ իրավապահ մարմինների կողմից իրականացվող գործողությունների տարածքներ եւ մարդաշատ վայրեր այցելություններից:

Արտակարգ իրավիճակներում հայտնվելու դեպքում դեսպանությունը խորհուրդ է տալիս անհապաղ կապ հաստատել Իրանում Հայաստանի դեսպանության հետ (e-mail: armiranembassy@mfa.am, հեռ.՝ (0098) 21 6670 4833, հասցե՝ Ջոմհուրի-ե Էսլամի պող., Ռազի պող., Օսթադ Շահրիյար փող., թիվ 32)։

Իրանի արդարադատության նախարարության վերջին տվյալների համաձայն՝ հարձակումների հետեւանքով զոհվել է 12 մարդ, այդ թվում՝ 4 ահաբեկիչ։

Վիրավորների թիվը 42 է: