Երեւան: Մեդիամաքս: Հայաստանի արտաքին գործերի նախարար Էդվարդ Նալբանդյանը հայտարարել է, որ ազգերի ինքնորոշման իրավունքի իրագործման մերժումը կամ դրան խոչընդոտելը կարող է պարարտ հող ստեղծել նոր հակամարտությունների համար:

«Հայաստանը մշտապես ասել եւ ասում է, որ ինքնորոշման իրավունքի իրագործումը պատճառ չէ նոր հակամարտությունների ստեղծման համար: Այլ ընդհակառակը՝ այդ իրավունքի իրագործումը կարող է կանխարգելել նոր հակամարտությունները եւ նպաստել տարածաշրջանային եւ միջազգային խաղաղության հաստատմանը, պահպանմանը եւ ամրապնդմանը»,- այսօր Երեւանում Մեծ Բրիտանիայի Եվրոպայի հարցերով պետական նախարար Դեյվիդ Լիդինգթոնի հետ կայացած համատեղ ասուլիսում ասել է Էդվարդ Նալբանդյանը՝ մեկնաբանելով օրեր առաջ ՄԱԿ-ի Գլխավոր վեհաժողովի 69-րդ նստաշրջանում ներկայացված՝ ազգերի ինքնորոշման իրավունքի վերաբերյալ անկախ փորձագիտական զեկույցը:

Նախարարի խոսքերով, Հայաստանը մշտապես հանդես է եկել այն մոտեցմամբ, որ ինքնորոշման իրավունքի իրագործումը կարող է նպաստել ժողովրդավարությանը եւ մարդու իրավունքների պաշտպանությանը:

«Այսօր միջազգային հարաբերությունների համակարգը, ՄԱԿ-ի անդամ 193 պետություններով հանդերձ, հենց ինքնորոշման իրավունքի իրագործման արդյունք է: ՄԱԿ-ի հիմնադրման ժամանակ եղել է 51 երկիր: Այժմ ՄԱԿ-ի անդամ երկրների թիվը համարյա թե քառապատկվել է: Դեմ դուրս գալ կամ անտեսել ինքնորոշման իրավունքը նույնն է, ինչ հակադրվել էվոլյուցիային: Կարելի է միանշանակ ասել, որ այդ կարեւոր զեկույցը եւս մեկ անգամ փաստում է Հայաստանի եւ բազմաթիվ երկրների մոտեցումները ազգերի ինքնորոշման հարցում»,- նշել է Էդվարդ Նալբանդյանը:

Նախարարի համոզմամբ, երկիրը, որտեղ պաշտպանվում են մարդու իրավունքները, չի կարող դեմ դուրս գալ ինքնորոշման իրավունքին: Այս համատեքստում Էդվարդ Նալբանդյանը հիշեցրել է վերջերս Շոտլանդիայում անցկացված հանրաքվեն: