Ավարտվեց Մալթայի Միջազգային Երաժշտական վեցերորդ փառատոնը, որի շրջանակներում ապրիլի 18-30-ը կայացան Հայաստանի մշակույթի օրերը: Վառ ու բովանդակալից միջոցառումների ցանկում ընդգրկված էին ֆոտոցուցահանդեսներ, ֆիլմերի դիտումներ եւ, իհարկե, բացառիկ համերգային երեկոներ՝ համաշխարհային ճանաչում վայելող մենակատարների եւ Հայաստանի պետական սիմֆոնիկ նվագախմբի մասնակցությամբ:
Հայ մշակույթի օրերի մեկնարկը տրվեց Արամ Խաչատրյանի 115-ամյակին նվիրված համերգով, որին նախորդեց Արամ Խաչատրյանի տուն-թանգարանի կողմից պատրաստած «Երաժշտության միջազգային լեզուն» ցուցահանդեսի բացումը. այն իր մեջ ընդգրկում էր կոմպոզիտորի լուսանկարները աշխարհի հայտնիների ընկերակցությամբ:
Եւս մեկ ցուցահանդես ներկայացրեց Կոմիտասի թանգարան-ինտիտուտը. «Կոմիտաս.կյանքը լուսանկարներում» էքսպոզիցիան բաղկացած էր 32 լուսանկարից, որոնք պատմում են վարպետի կյանքի տարբեր ժամանակահատվածների մասին:
Հայկական օրերի շրջանակներում Մալթայում առաջին անգամ հնչեց Կոմիտասի խմբերգային երաժշտությունը: Խմբավար Սիփան Օլահի ղեկավարությամբ Մալթայի հավաքական կամերային երգչախումբը Կոմիտասի 10 երգ կատարեց:
Մեկ այլ կարեւոր «պրեմիերա» կայացավ վիեննաբնակ դաշնակահարուհի Նարե Արղամանյանի եւ Մալթայի սիմֆոնիկ նվագախմբի երաժիշտների համագործակցության շնորհիվ. հանրությանը ներկայացվեց մաեստրո Տիգրան Մանսուրյանի կամերային երաժշտությունը:
Մալթայում ներկայացվեցին նաեւ հայկական ժողովրդական պարեր՝ Մարսելից ժամանած «Արաքս» պարային համույթի կատարմամբ: Համույթի մասնակիցների էներգետիկան այնքան վարակիչ էր, որ հանդիսատեսը երկար չէր ցանկանում բաժանվել «Արաքս»-ի երիտասարդներից:
Մեծ հաջողությամբ անցան մեր պատանի երաժիշտների քառօրյա հյուրախաղերը. քանոնահարուհի Մերի Մուսինյանը, դուդուկահար Գեւորգ Ստեփանյանը, դաշնակահարուհի Էլեն Հարությունյանը եւ վոկալիստ Վահրամ Հովհաննիսյանը առաջին անգամ էին շրջագայում միասին: Համերգներից ոգեւորված, խոստացան վերադառնալ Մալթա՝ նոր ծրագրով:
Մեծ էր հետաքրքրությանը Արտավազ Փելեշյանի «Տարվա եղանակները» կինոպոէմի եւ Միքայել Պողոսյանի եւ Հրաչ Քեշիշյանի «Շնորհակալություն, հայրիկ» ֆիլմի նկատմամբ:
Հայ մշակույթի օրերի շրջանակում հատուկ տեղ ունեին Զավեն Սարգսյանի հեղինակած «Խաչքարեր» եւ «Քարերի գաղտնիքը» ֆոտոցուղահանդեսները:
Հայկական օրերի եզրագիծը նշանավորվեց «Խաչատրյան տրիո»-ի համերգով:
Երեկոյի ընթացքում արդեն իր ուրույն, ճանաչելի դարձած հնչեղությամբ եռյակը կատարեց Արամ Իլյիչի ստեղծագործությունները, Առնո Բաբաջանյանի «Նոկտյուրնը», ինչպես նաեւ՝ Ալեքսեյ Շորի յոթ պիեսները:
Այս ծրագիրն ընդգրկված է տրիոյի նոր ձայնասկավառակում՝ թողարկված աշխարհահռչակ Sony ընկերության կողմից:
Հայկական օրերը փակվեցին Չայկովսկու անվան միջազգային մրցույթի դափնեկիր, թավջութակահար Նարեկ Հախնազարյանի «The Magic Cello» համերգով:
Այդ օրը Հայկական պետական սիմֆոնիկ նվագախումբը ղեկավարում էր Նարեկի ավագ եղբայրը՝ դիրիժոր Տիգրան Հախնազարյանը: Եղբայրները խոստովանեցին, որ համատեղ համերգները առանձնահատուկ են իրենց համար, իսկ փոխըմբռնումն այնքան ուժեղ է, որ միմյանց նայելու անհրաժեշտությունը անգամ չկա:
Իրապես մոգական միջավայրում հնչեցին Չայկովսկու «Ռոմեո եւ Ջուլիետ» նախերգանք-ֆանտազիան, Ու. Էլգարի՝ թավջութակի եւ նվագախմբի համար կոնցերտը եւ Ա. Շորի երեք պիեսները:
Խորհրդանշական էր, որ Հայ մշակույթի օրերի փակումը համընկավ Մալթայում անցկացվող ավանդական Հրավառության տոների հետ եւ համերգից հետո հանդիսատեսներին հնարավորություն ընձեռվեց հետեւել այդ հեքիաթային տեսարանին:
Մալթայի Միջազգային երաժշտական փառատոնին մեր գլխավոր հպարտություններից էր Հայաստանի պետական սիմֆոնիկ նվագախումբը, որը հանդես էր գալիս որպես ռեզիդենտ: Այդ «երաժշտական մարաթոնի» ընթացքում նվագախումբը ելույթ ունեցավ աշխարհի ամենապահանջված երաժիշտների հետ:
Բացի այդ, Սերգեյ Սմբատյանի ղեկավարությամբ բեմում միավորվեցին Հայաստանի եւ Մալթայի նվագախմբերը՝ Ա. Շորի ստեղծագործության համաշխարհային պրեմիերայի եւ հայ մեծ հանճար Ա. Խաչատրյանի ստեղծագործությունները կատարելու համար: Նվագախումբը նաեւ մի ամբողջ օր նվագեց փառատոնին զուգահեռ ընթացող Դաշնակահարների միջազգային մրցույթի եզրափակիչ դուրս եկած 6 երաժիշտների հետ:
Փառատոնի ամփոփիչ ասուլիսում հայտնի կոմպոզիտոր եւ դիրիժոր Քշիշտոֆ Պենդերեցկին ասաց.
«Այն, ինչ արեց Հայաստանի պետական սիմֆոնիկ նվագախումբը՝ շատ տպավորիչ է: Սա նաեւ մեծ ձեռքբերում է Հայաստանի համար»:
Հիշեցնենք, որ Հայաստանի մշակույթի օրերը կայացան Մշակույթի աջակցության եվրոպական հիմնադրամի շնորհիվ՝ Մալթայի մշակույթի, սոցիալական արդարության եւ տեղական ինքնակառավարման նախարարության, Հայաստանի մշակույթի նախարարության, Arts Council Malta-ի եւ Valletta-2018 Foundation-ի աջակցությամբ:
Աննա Բուբուշյան (Մալթա-Երեւան)
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: